اليوم غادي نهضرو في واحد الموضوع لي ديما كنسمعو بيه، و كاين بزاف ديال الناس كيتساؤلو عليه، كاين لي ماعارفش هاد النظام، وكاين لي مافاهموش وكاين لي مزال ماسمعش بيه، وهاد النظام مهم بزاف باش تبدا المشروع ديالك، هو نظام المقاول الذاتي.
أول حاجة غانبداو بيها هي نعرفو شنو كيعني نظام المقاول الذاتي: هو واحد النظام لي وضعاتوا الدولة سنة 2015، والفكرة خداتها من فرنسا، وطبقاتها في قانون رقم 114.13 المتعلق بنظام المقاول الذاتي، الهدف من هاذ النظام هو مساعدة الشباب حاملي المشاريع، يعني مشي ضروري يكون عندك ديبلوم أو شهادة باش تستافد منو، يكفي فقط يكون عندك خبرة في بعض المجالات: التجارة، الصناعة، الحرف، وكذالك الخدمات، حيت كاين مجموعة ديال الناس كيمارسوا هذ الأنشطة بشكل عشوائي، ف بهاذ النظام الدولة قررات أنها تسهل الأمور على الشباب، ويخدمو بوحد الشكل اللي قانوني ومنظم.
بزاف ديال الشباب كيفكروا من بعد مايشدو الديبلوم ديالهم يأسسو مشروع خاص بيهم، ولكن كيواجهو بغض الصعوبات في البداية، فكيفما كتعرفو باش تبدا مشروع فالمغرب ضروري مايكون عندك راس المال، فخاصك المقر، خاصك تخلص الضرائب..، هاذ الأمور و غيرها كتخلي بزاف ديال الشباب يتراجعوا عل المشاريع ديالهم، فاليوم نظام المقاول الذاتي الدولة كيخول ليك، تمارس نفس الأنشطة لي كيمارسوها الشركات مع الإستفاذة من بزاف ديال الإمتيازات من بينها:
☆ مشي مفروض عليك باش تسجل في السجل التجاري.
☆ مشي مفروض عليك دير المحاسبة عل الأعمال كيف ما كيديرو الشركات لكبار.
☆ يمكن ليك تولي تعطي الفكتور، التوصيل بالكاشي ديالك للناس لي كتعامل معاهم.
☆ بالنسبة للمقر ديال المشروع ديالك ممحتاجش باش دير شي محل، يكمن يكون المقر ديال الشركة ديالك هو دارك.
☆ الميزة الأخرى هي إيلا قدر الله ووقعو ليك مشاكل مالية في الخدمة (إفلاس مثلا)، مغاديش يحجزوا ليك على دارك.
☆ يمكن ليك تستافد من التغطية الصحية والإجتماعية، يكفي أنك تسجل في الضمان الاجتماعي.
☆ وأخيرا الإعفاء من الضريبة على القيمة المضاف %TVA .
كيف ما سبق وقلنا باش تستافد من هاذ النظام خاصك اكون عندك مشروع وكتفهم في بعض الأنشطة لي سبق وهضرنا عليها.
وباش تعرفو شنو شنو هي الأنشطة لي مسموح بها يكفي أنكم دخلوا الموقع www.ae.gov.ma غادي تلقاو فيه جوج ديال للوائح الأولى كتهم الأنشطة لي مسموح بيها تكون في المقاول الذاتي، والثانية غادي يكون فيها الأشخاص اللي معندهمش الحق يستافدو من هد النظام.
من جهة أخرى خاص تحترموا الحد الأقصى لرقم المعاملات السنوي لي هي الأرباح السنوية ديالك واللي حددتها الدولة في 500 ألف درهم أي 50 مليون سنتيم فالعام بالنسبة للقطاع التجاري والحرفي والصناعي، و 200 ألف درهم لي هي 20 مليون سنتيم بالنسبة للأنشطة الخدماتية، حيت إيلا تجاوزتي هاد الأرباح في سنتين على التوالي غادي تكون مجبر باش تبدل من نظام المقاول الذاتي إلي شركة.
دبا غادي نهضرو عى كيفية التسجيل في نظام المقاول الذاتي، أول حاجة غادي ديرها هي تزور الموقع re.ae.gov.ma، فاش كدخلوا لهاد الموقع كتلقاو واحد الإستمارة كتعمروها من بعد كتخرجوها وكديرو الإمضاء ديالكم، وكتجيبو الفطوكوبي ديال لكارط نسيونال وصورة شمسية وكتوجهو إلى أقرب وكالة بنكية قريبة ليكم (البريد بنك،التجاري وفا بنك،BMCE BANK, CIH ,الشركة العامة...) وكتحطو الملف ديالكم وكتوصلو بواحد الروسي وكتبقا متبع الملف ديالك عبر البوابة الالكترونية لي تسجلتي فيها، ومنين كيوافقو على المشروع ديالك، كيتم تسجيلك في السجل الوطني للمقاول الذاتي، وغادي يعطيوك واحد البطاقة كاتسمى بطاقة المقاول الذاتي.
لي غادي تخليك تتبت الوضعية ديالك مع الناس لي كتعامل معاهم، وغادي يكون عندك رقم تعريف ضريبي خاص بيك ورقم تعريف ديال الضريبة المهنية، وهكا غادي تكون وليتي مقاول ذاتي.
وحاجة أخرى مهمة بزاف خصك تعرفها فاش غاتولي مقاول ذاتي هي أنك غادي تكون ملزم باش تصرح بالمداخيل ديالك كل أربعة أشهر، يعني الأرباح ديال شهر 1،2،3 غدي تصرح بيهم فشهر 4، و ديال 4،5،6 غدي تصرح بيهم فشهر 7 وهكذا، و ايلا مدرتيش هاذ التصريح كل 3 أشهر غدي تخلص واحد المبلغ مالي عبارة عن 100 درهم زائد %5 ديال الأرباح على كل شهر تأخرتي فيه، و ايلا تعطلتي عام كامل من غير العام لي تسجلتي فيه غدي يشطبوا عليك من السجل الوطني لنظام المقاول الذاتي، وتخلص مبلغ مالي على التأخر.
المهم باش ديكلاري بالأرباح ديالك ولا باش تأذي الضريبة لي عليك كتم هاذ العملية عبر الموقع الإلكتروني www.rn.ae.gov.ma، وعندك الإختيار في كيفية الأداء، إما عن طريق لكارط بونكير ديالك، ولا تخرج الإستمارة وتمشي للوكالة لي فتحتي فيها لحساب ديالك بصفتك مقاول ذاتي.
للإشارة الأشخاص ليميمكش ليهم إيزاولوا هاد النشاط ديال المقاول الذاتي وممنوع عليهم هما القاصرين أقل من18 سنة، الأجانب، ناس لي مراض ولا عندهم إعاقة يعني ذوي الاحتياجات الخاصة، ناس اللي في حال سراح مؤقت، ناس لي سبق ليهم دوزوا عقوبة سجنية إما بسبب السرقة الموصوفة أو الضرب أو الجرح... وكذالك ناس لي كيخدموا في بعض المهن مثلا، طبيب، محامي، موثق، برلماني، مهندس، وكذالك الناس لي خدامين في شركات.
المهم هدشي لكاين ، والله يسهل على الجميع.
واللي عندو تجربة وسبق ليه تسجل فهاذ النظام، يعاود عليها باش واحد آخر إستافد
تعليقات
إرسال تعليق