سطاج هو واحد المناسبة لي كاتمكنك من انك تشوف الناس المهنيين كيفاش تيشتاغلو عن قرب و تكتشف المهن ديالهم مثلا comptable، secrétaire، responsable R.H ... الخ. و هادشي كيعاونك باش تكون فكرة شاملة على كل مهنة فيهم. الهدف من سطاج هو تكتشف عالم الشغل و تكتسب تجارب متعددة بالإضافة لأهم حاجة و لي هي طبق هادوك المعارف لي كتسبتيهم فالنظري ( mettre en pratique vous connaissance ).
أهم حاجة فالسطاج هي واش تقدر فعلا دير ديك الخدمة أو المهنة ولا لا ؟ نديرو مثلا نتا هو R.H ولا مسؤول الموارد البشرية، هاد البوسط مشي أي واحد اقد عليه، حيت الطريقة باش كيهضر responsable R.H مشي هي نفس الطريقة لي كاتهضر بيها نتا فالزنقة ولا فالتجمعات العائلية أو مع الأصدقاء ... باش تفهم مزيان نفترضو انك مشيتي دوز سطاج فشركة X و تلاقيتي بهاداك لي مكلف بالموارد البشرية تما، شوية و هوما اجيو شي ناس كبار فالعمر باغى الشركة تستغنى عليهم قالو لهم نعطوكم شوية و تمشيو! طبعا هوما رفضو و جاو عند R.H تيغوتو عليه " وا حنا بغيتو تسمحو فينا و حنايا العمر ديالنا فنيناه هنايا هدشي مشي معقول ... " كون كنتي بلاصتو غاتعصب و تقوليهم " نوضو تكعدو عليا من هنا عطوني بتيساع! " أش دار هو (R.H) ؟ نتا اسي احمد راك مريض كتاكل الدوا و عيان هاد البركة لي غادي اعطيك "الوزين" غاتمشي لدار ديالك و تحل فيها واحد الحانوت ديال البيع و الشراء، نتا ا فلان ... يعني عطاهم الحلول، جاو تيغوتو و مشاو كيضحكو! كون كنتي نتا غاتقوليهم بغيتي مابغيتيش لهلا كاع تمشي!
حاجة اخرى، ديرو سطاجات متنوعين واحد سطاج في شركة و لاخور في بنكة ... خاصة لي عندو تدبدب في اختيار العمل، يعني مزال معارفش أش غايدير؟! واش نتا منيش على la comptabilité سير دير واحد اربعة اشهر ولا خمسة اشهر ف la fiduciaire هادا ايلا بغيتي تكون كونطابل، أما ايلا كنتي ما كتحملش la comptabilité دير سطاج ف agence de voyage وخا صعيبة شوية مانصحكمش بيها حيت غاتكون عندك مهام محدودة ( Limité ).
كاين واحد البلان سميتو " présélection " كيخدمو بيه الشركات ولا المؤسسات ... فاش كادوز سطاج فواحد البوسط لي هو مهم خاص لي شدو ليهم، نتا كسطاجيير هوما كايراقبوك كل نهار، اي حاجة اي حركة درتيها كلشي مراقبينو، و ايلا عجبتيهم تيقولو ليك نتا احسن واحد لهاد البوسط و كيوقع عليك الإختيار، علاش؟ حيت سطاج كيتعتبر وسيلة من بين وسائل اخرى كيعتمدوها الشركات و المؤسسات ... في الإختيار و الإنتقاء ديال أي متدرب.
كاين لي كيدير السطاج تيقوليك اودي بلا مانمشي هاد الصباح تال غذا مكاين لي داها فينا، غير كيبان ليك، الناس كيراقبوك و حاضينك أش كادير غير رد البال لفعايلك.
قبل الإختيار أو " présélection " ما قلناش " sélection " حيت نتا مزال سطاجيير، ملي كاتكمل معاهم المدة ديال السطاج كيقوليك فين غادي؟ دبا عرفتينا و عرفناك، ولفتينا و ولفناك شوف غانعطيوك قدا و قدا فالصالير أش ظهر ليك؟ هادا ايلا ناقش معاك الصالير لأن نتا صافي دوزتي معاهم مدة ديال السطاج. امتى ما كناقشوش الصالير ؟ ايلا كان شيواحد جديد لي ما دارش معاهم سطاج تيديرو معاه mois d'essai ايلا كان اصلح لهاداك البوسط تيدخل اخدم بحالو بحال اي واحد خدام فديك الشركة، هاد البلان هو لي كيتسمى ب " présélection ".
الوثائق لي خاصك تجمعها ايلا بغيتي دير سطاج و أنواع سطاج لي كاينين : ناخدوا مثال ديال سطاج فالبنك كما يمكن ليك ديرو فبزاف ديال المؤسسات بحال الفنادق ، مؤسسات التامين, assurence ، comptable ....
الوثائق المطلوبة :
- نسخة من CV
- نسخة قانونية copie légalisée من البكالوريا او ديبلوم ديالك ( ماشي كلشي كيطلبها)
- نسخة من تأمين التدريب assurance de stage
- طلب تدريب demande de stage
- نسخة من البطاقة الوطنية .
بالنسبة لسطاج فالبنك خاصك تحط الملف ديالك ف des banques succursale لي هي الادارة العامة ديال الابناك فكل مدينة ماشي ف les agences صغار .
أنواع السطاج :
▪ 1. السطاج كيتسمى Stage d'observation أو Stage d'initiation :
هاد السطاج المدة ديالو كاتكون قصيرة (من 15-30يوم غالبا)، كما أنه غير إجباري. فهاد السطاج كاتعرف فقط على البيئة اللي كتخدم فيها الشركة، يعني الهدف منو هو تعرف على طريقة عمل الشركة sous différents aspects ونادرا مكتعطاك شي مهمة تقوم بيها. فآخر هاد السطاج كاتكون مطالب دير rapport de stage لي كتكتب فيه vos impressions على الشركة.
▪ 2.سطاج تسمى Stage opérationnel أو Stage ouvrier :
فهاذ النوع من السطاجات كتعيش فالحياة ديال الشركة، يعني كتقوم بعدة مهام لي كاتخص سواء La production أو La vente ديال المنتوجات، يعني كتساهم بطريقة مباشرة فتحقيق الأهداف الإقتصادية ديال الشركة (شركة انتاج-بنكة...) ولكن مع المراقبة والتوجيه الدائم.
هاد السطاج المدة ديالو كتراوح مابين 30يوم الى 90يوم. فآخر هاذ السطاج كتكون مطالب تقاد rapport وكدوز une présentation orale باش تفاليدي la formation ديالك. الهدف الرئيسي: هو تطوير المهارات العملية ديالك (developper son employabilité)
▪ 3. سطاج كيتسمى stage fonctionnel :
هاذ السطاج كتراوح المدة ديالو مابين 4 تال 6 أشهر، وكتقوم فيه بآداء مهام شبيهة بزااف للمهام لي كيقوم بيها موظف عادي داخل الشركة، يعني كاع دكشي لي théorique لي كنتي قريتي جا الوقت ديا باش تطبقو على أرض الواقع pratique فاللخر ديال هاد السطاج كتكون مطالب تقاد rapport وتكلم على التجربة ديالك كيف دازت أمام واحد اللجنة (soutenance).
تعليقات
إرسال تعليق