ربما تكون سمعتي بمنطقة الراحة و كيفاش تخرج منها باش تحقق الأهداف ديالك في الحياة و تكتاشف جوانب أخرى من شخصيتك. واش قدرتي تخرج من Comfort zone ديالك ولا باقي حاصل فيها ؟ واش تجاوزتي الحدود لي رسمتيها لراسك ولا مزال كاتقاتل فيها ؟ واش طورتي نفسك و ظروف حياتك ولا وقفتي حيت انت راضي على دكشي لي وصلتي ليه ولا حيت انت محاصر في هاد المنطقة لي وضعتي فيها نفسك ؟ باش تأكد من أنك وقعتي في الفخ ديال منطقة الراحة من عدمه، حاول تجاوب على هاد الأسئلة لي ما غاتاخدش منك وقت كثير في التفكير .
إمتى كانت آخر مرة درتي فيها شي حاجة جديدة ؟ مثلا قريتي كتاب، مشيتي شي بلاصة عمرك مشيتي ليها من قبل، بدلتي الطريق ديالك للخدمة ... إمتى كانت آخر مرة هضرتي فيها مع شي واحد خارج دائرة الأصدقاء و العائلة ديالك ؟
بزاف ديال الناس كيوجدو صعوبة كبيرة أنهم اديرو حوايج جديدة في حياتهم ما عندها حتى علاقة بالعادات اليومية لي ولفو اديروها مرارا و تكرارا و لسنوات طويلة، حتى لقاو نفسهم كيأديوها بسهولة كبيرة و كيرتاحو ليها.
فمجرد التفكير في القيام بنشاطات جديدة غير مألوفة بالنسبة ليهم كاتخليهم يتوترو و احسو بالخوف و عدم الأمان، و كيوليو في وضع غير مريح هدشي كيخليهم ابقاو في منطقة الراحة الخاصة بيهم و كيرجعو ل Comfort zone بأسرع وقت ممكن باش يتمسكو بيها اكثر من اللول!
ايلا كان التغيير كيخلعك ... ايلا كنتي ماقادش تحقق أهدافك وخا تكون صغيرة، ايلا كان نمط حياتك روتيني لواحد الدرجة كيخليك تحس بالملل و الركود ... ايلا كانت شي حاجة فالداخل ديالك كاتقوليك بلي راك محتاج تْبَدَّل، فهدشي كيعني أنه هادا هو الوقت المناسب لي خصك تخرج فيه من Comfort zone.
🔹️ منطقة الراحة هي السبب في المشاكل ديالك ؟
الخروج من Comfort zone لي تعودنا عليها و ولفناها مشي ساهل و كيحتاج شوية دالجهد و الوقت و لكن كيبقى أمر ممكن، بينما واحد الفئة كاتشوف بلي هدشي صعيب بزاف و بعد المرات غير ممكن حيت فيه مخاطرة كبيرة كاتهدد أمنهم و راحتهم!
شنو غاتكون ردة الفعل ديالك ايلا قلت ليك بلي هدشي لي كاتسميه انت "الأمن و الراحة" ما هو إلا سراب و أعذار زائفة كاتبرر بيها الخوف و العجز ديالك على أخد زمام المبادرة باش تغير الأمور السلبية في حياتك ؟ شنو غاتكون ردة الفعل ديالك ايلا قلت ليك أن منطقة الراحة مجرد وسيلة كاتستخدمها باش تهرب من الواقع المزري لي كاتعيشو في حياتك و هدشي لي كيخليك تستسلم للأمر الواقع ؟ شنو غاتكون ردة الفعل ديالك ايلا قلت ليك أن منطقة الراحة مجرد عذر باش ماتحملش المسؤولية و تحسن الوضع ديالك ؟
• باش ماديرش Sport و ماتْخَلاَّش على السلوك الغذائي غير الصحي، كاتْفَضَّل تخلي نفس الوزن و نفس الجسم، إذن انت ماكيهمكش تحيد عليك الوزن الزائد ولا تبني فورمة واعرة حيت بكل بساطة إلى خرجتي من الوضع اللول (منطقة الراحة) لي تعودي عليه و ولفتيه غايخصك الجهد و الوقت و العزيمة هادو لي ماكيتوفروش فيك حاليا.
• تبقى في نفس المستوى من العلم و في نفس المنصب الوظيفي بالنسبة ليك انت كيبقى خيار أفضل، إذن علاش غاتبذل مجهود كبير باش تنمي المهارات و القدرات ديالك بينما المستوى الحالي كيضمن ليك لقمة العيش ؟
• بالنسبة ليك، تعيش بعيد على العائلة و الأصدقاء كيبقى خيار أفضل، بدل أنك تواجه الخجل ديالك و الصعوبات لي تقدر تواجهك في طريقك و انت كاتبني دائرة من العلاقات الناجحة و الإيجابية.
رفض التغيير ديما كيكون ساهل، و لكن مايمكنش ليك دمر الأمور السلبية في حياتك من بعد حيت ايلا ماخرجتيش من Comfort zone ما غاتقدرش تحدث "الفارق" في أي حاجة كاديرها و عمرك ما غاتزيد القدام ... غادي تبقى انت كما انت في نفس البلاصة و في نفس الوضعية، غاتلاقى بنفس الأشخاص و تعامل مع نفس "مول الحانوت"، تقرا نفس الكتوبا و دوز من نفس الطريق لي كاتوصلك للخدمة ... و تاكل نفس الماكلة ... تلبس نفس الحوايج ... تعيش بنفس السلوكات السلبية ... تعاني من نفس المشاكل الصحية و المهنية حتى لآخر يوم في حياتك.
هدشي لي بغيتي ؟ أنا متأكد من أنك مابغيتيش تعيش في نفس نمط الحياة لي وصفتو ليك دبا، و لهادا فأنت أمام حل واحد ... اخرج من Comfort zone لي حابس فيها راسك قبل مايفوت الحال💁♂️ و ابحث على التغيير 😉
🔹️ علاش خاصك تخرج من منطقة الراحة لي انت حابس فيها راسك وحياتك ؟
حيت ايلا خرجتي من منطقة الراحة ديالك غادي تولي واحد آخر، غاتعلم مهارات جديدة، و تقضي على التسويف، غاتولي عندك القدرة و الوقت باش دير Sport، و غاتعلم لغات جديدة، و تولي تهضر مزيان مع الناس و قدام Public، النظام الغذائي ديالك غايولي صحي اكثر … هدشي كامل غادي وقع في حالة ايلا خرجتي من Comfort zone، و هادي غادي تكون غير البداية فقط.
بزاف دالناس فشلو في تحقيق الأهداف ديالهم، و السبب في هدشي هو أنهم ماعرفوش كيفاش يتعاملو مع التغيير لي طرا في حياتهم و لي جعلهم احسو بعدم الراحة، دكشي علاش الأغلبية كيهرب من هاد الإحساس ولو كان إحساس مؤقت كيتواجهو معاه في البداية فقط، ولكن هوما ميقدروش يتحملوه، هدشي لي كيخليهم ارجعو بسرعة في الإتجاه المعاكس في كل مرة كيفقدو فيها الإحساس بالراحة.
هدشي لي كيجعل "التغيير" صعيب بزاف. وهو نفس السبب لي خلا بزاف دالناس يفشلو في تغيير عاداتهم، حيت كيديرو ما في جهدهم باش يتصداو للإحساس بعدم الراحة لي كيتصادفو معاه في الوضع الجديد وخاصة في البداية. كون صبرو غير شوية كون مشى داك الإحساس بعدم الإرتياح و تحول لإحساس جيد ومريح.
تخيل معايا واحد الشخص لي باغي يبني علاقات اجتماعية ناجحة و يتكلم بكل أريحية أمام Public ويتخلص من الخوف ديالو في التعامل مع الناس ولكن مايقدرش يتعامل مع داك الإحساس المؤقت لي كيخليه احس بالتوتر وعدم الراحة في التجمعات و في التواصل ديالو مع الطرف الآخر ... فإيلا كان شي درس نقدرو نتعلموه من هدشي فهو نتعلمو كيفاش نتعايشو ونتأقلمو مع القليل من عدم الراحة، حيت ايلا خرجتي من Comfort zone لي طولتي فيها الجلوس بزاف اكثر من القياس، اقدر يرجع عليك هدشي بالنفع من بعد .
🔹️ كيفاش تخرج من منطقة الراحة بنجاح ؟
الخروج من منطقة الراحة كيتم ببطء وبالتدريج فحال أي تغيير آخر في حياتك و مشي مرة واحدة، وبالتالي ايلا حاولتي تقفز خارج الدائرة ديالك لي تعودتي عليها مرة واحدة و بدون مقدمات غادي يؤدي بيك للسقوط هادي ما فيها شك، و اقدر يكون سقوط حر وبالتالي غادي تتأثر وتتأذى، وطبعا هدشي لي مابغيناش. و دكشي علاش كانقول أن التغيير خاصو يكون بالتدريج وخطوة بعد أخرى ...
هادي أهم النصائح لي غادي تساعدك باش تخرج من منطقة الراحة الخاصة بيك :
▪حدد Comfort zone ديالك : كل واحد فينا عندو منطقة راحة خاصة بيه، ربما تكون منطقة الراحة ديالي كاتختلف على منطقة الراحة ديالك انت، حيت المخاوف ديالي كاتختلف على المخاوف ديالك، و الروتين اليومي حتى هو كيختلف من شخص لآخر، هكا حنا البشر مختلفين و هدشي طبيعي. دكشي علاش خاصك تحدد منطقة الراحة ديالك، كيفاش ؟ وخا أنا انشرح ليك كيفاش، خاصك في البداية تعرف شنو هي الأشياء لي ماكاتشكلش تحد بالنسبة ليك، أعمال كاديرها بشكل متكرر وروتيني حتى ولات بلا معنى بالنسبة ليك … فكر في كاع الأمور لي باغي تحققها ولكن انت ماقادش تحققها بسبب الأعذار و المبررات السخيفة لي كاتصبرها بيها راسك… فكر في آخر مرة درتي فيها شي حاجة جديدة ومختلفة.
المهارات لي عندك دبا و لي اكتسبتيها هادي سنوات كاتعتبر منطقة الراحة ديالك… المطعم لي كاتاكل فيه باستمرار و ماعمرك بدلتيه بشي واحد آخر هادي شهور حتى هو كيمثل منطقة الراحة ديالك … البلاصة لي كاتمشي ليها مع عائلتك في العطل و لي ماتبدلاتش منذ سنوات حتى هي بدورها كاتعتبر منطقة الراحة ديالك.
صافي حددتي Comfort zone ديالك ؟ مزيان دبا ندوز للنقطة الثانية.
▪بدا تخرج شوية بشوية : التغيير كيجي بالتدريج، و لي كيقوليك راه كاينة واحد الطريقة ديال التغيير في 7 أيام قوليه ماعنديش الوقت لي نضيعو معاك في بحال هاد الخزعبلات. قليل فاش كيأدي التسرع لنتائج مزيانة، دكشي علاش كانصحك تأقلم مع وضع "التغيير" و تخرج من منطقة الراحة بشكل تدريجي، و حاول دير أمور ساهلة وبسيطة عارف أنك قادر تنجح فيها، انت مامحتاجش تهز كتاب و تقرا عشرين صفحة في النهار، صفحة واحدة كافية كبداية، مشي مهم شحال من صفحة تقرا، المهم هو تبدا.
▪عقل على المغزى من هدشي كامل : ملي كادفع براسك خارج منطقة الراحة ديالك غادي تواجه بزاف ديال المشاعر السلبية والتعب والملل ولكن ماخصكش توقف عندها وتستسلم. في كل مرة تشوف فيها راسك باغي ترجع لمنطقة الراحة عقل على المغزى والهدف من هدشي لي كادير، فكر علاش كادير Sport عوض أنك تجلس وتصفح Internet ؟ علاش كاتقرا و تجتاهد باش تفهم الدروس عوض تبقى نهار و ما طال مقابل التلفزة ؟ علاش كاتقرا الكتب المهمة و النافعة بينما الأصدقاء ديالك كيقراو الجرائد الرياضية ؟
🔹️ بعض الأفكار لي غادي تعاونك باش تخرج من منطقة الراحة :
دبا غادي نعاونك ببعض الأفكار لي يمكنك ليك طبقها في رحلتك نحو ترك منطقة الراحة الخاصة بيك لي ما تفارقتيش معاها هادي سنوات (:
▪ تقدر تكون من بين الأشخاص لي عزيز عليهم امشيو للسينما و نفس الحديقة في كل مرة كاتخرج فيها مع صحابك ولا عائلتك. علاش ماتحاولش دخل بعض التغيير وتجرب حديقة جديدة مثلا ولا سينما اخرى غير السينما لي ولفتي تمشي هادي مدة ؟ ... جرب و غادي تكتشف أن الأمر كيستحق.
▪واش ولفتي تفيق معطل ؟ علاش ما تحاولش تفيق بكري، هدشي عندو فوائد كثيرة على صحتك. الأشخاص لي هوما ناجحين و متفوقين في حياتهم كيفيقو بكري و ماكينعسوش ساعات طويلة، و هادا هو سر الإنتاجية ديالهم، الفياق بكري كيسمح ليك تستغل الساعات الأولى بكفاءة عالية، فحال القراءة مثلا و التأمل وغيرها من النشاطات الصباحية.
▪ايلا كنتي شخص منطوي كيخاف اهضر مع الناس ولا كيحشم يتعامل معهم لسبب أو لآخر فراه جا الوقت باش تحيد منك هاد القاعدة لي كاتمنعك من اقامة علاقات اجتماعية ايجابية، و الخطوة ديالك الأولى باش تحقق هدشي هو تخرج من Comfort zone ديالك و ماتبقاش تخبى و تهرب من الناس.
▪ماتبقاش تفرج في البرامج الرياضية والمباريات والمنافسات العالمية لي كيدوزو في التلفزة و بدا دير Sport. خصص يوم ولا يومين في الأسبوع باش دير رياضة الجري أو أي رياضة أخرى كاتبغيها، تسجل في قاعة رياضية قريبة من البلاصة لي انت ساكن فيها وحاول تحافظ على Program ديال التدريبات.
🔶️ في الأخير
ماتحبسش راسك في Comfort zone، حيت بهكا غاتبقى بنفس المهارات وبنفس العادات وفي نفس الوضع.
خرج من منطقة الراحة وتعلم أشياء جديدة، طور المهارات ديالك، ابني علاقات ايجابية لي تفيدك في حياتك الشخصية والمهنية، و بعد على الروتين القاتل والحياة الآلية لي نتا عايش فيها.
تعليقات
إرسال تعليق